mercoledì 28 ottobre 2009

Poesia palermitana che gira su facebook

LI SURDATI DI LA PACI

Ai sei ragazzi della Folgore caduti anche per me

Parteru
cu li vrazza spalancati
li surdati di la paci

parteru pi fari di li petri sulu casi
e d’ogni casa
un munnu senza porti

Sapevanu di vita e di curaggi
quannu si prisintaru a la Caserma
cu l’ultimi canzuni di Morandi

Sapevanu di latti e di spiranza
di ziti e di muggheri
di nutrichi e pani di paisi
Chianceru - ddu jornu -
ca ‘ntisiru la vita

addumannari a la vita ‘na carizza
e nun durmeru - dda notti -
ca vitturu la morti
annacari ntra li vrazza un picciriddu

Pateru sutta Pilatu
li surdati di la paci
un Pilatu cu li manu puliti
e li sacchetti chini di paroli...

a la vita ci parsiru minzogni

a la morti ci parsiru bestemii

Ciariavanu di sciampu e dopobarba
quannu li spugghiaru
pi metticci li ali...
quannu si prisintaru ‘n-paraddisu
pi cunsignari l’ultimi risati
l’ultimi paroli
li sonnira ca ci arristaru ntra li manu

Lu celu - dda notti - spalancau la porta
pi fari tràsiri lu cori di sei matri

Lu munnu - ddu jornu - persi la pietà
persi sei figghi

E li pinseri scarpisanu lu scuru
circannu la raggiuni.

Nessun commento:

Posta un commento